Gawai Dayak Sibu 2014 kena 17 Mei 2014

Pengerami Makai Malam Gawai Dayak Sibu 2014

Haribulan:  17 Mei 2014

Endor:        Ballroom, Kingwood Hotel, Sibu.

Jam:           6:30pm - 11:30pm

Temuai ke dipebasa enggau malam:  

YB Tan Sri William Mawam Ak Ikom

Rega Tiket:    RM1,000.00 semija (udah ambis)

                      RM700.00 semija (mimit aja agi)

                      RM500.00 semija (mimit aja agi)

Program:

1.  Perangsang Pelajar (Minta semua apai/indai meli tiket sida nengah Pn. Lolita Jimmy Jalil.  Diatu benong ngerista bala anak-anak ke bulih pemutus pereksa ke manah alam taun 2013, nitih ke kriteria ke udah diatur.)

2.  Main Asal ari OUNA, SIDS, SDNU - Kajat Orang Ulu, Iban (Kaban SIDS), Bidayuh (Anak-Anak SIDS), Kuntau.

3.  Muzik ari band 'Red Heckles'

4.  Penyanyi-penyanyi (deka dipadah dudi ila)

5.  Pekit Kumang Gawai Dayak 2014

6.  Pekit Keling Gawai Dayak 2014

Minta semua bala kaban SIDS, OUNA, DBNA, SDNU & bala kitai Dayak ke diau di Sibu sama enggau ngerami malam nya.  Beli tiket Gawai kita enggai ke enda ampit.

Terima kasih.

Nemuai ngagai Rh. Adin, Sg. Engkalat kena 26.4.2014

Kena hari enam tu kemari, kira 6 orang bala kaban SIDS Sibu bisi nemuai ngagai Rh. Adin, Sg. Engkalat ke kena penusah rumah panjai augus empai lama tu kemari.  Bala SIDS Sibu ke enggau ianya Pengerusi, Pemegai Wang, Tuai Kawasan Aup & Rantau Panjai serta bala kaban bukai.

Sarakup endang bisi atur nulong bala kitai Dayak ke kena penusah baka tu; lalu mega lebih-lebih agi ngagai bala kaban Sarakup empu.

Tuju SIDS Sibu nemuai ianya ketegal ke deka nyua ke tulong mata duit ke bala ke tinggang penusah nya.  TR Adin & Pemenca Stanley Gramong nyabut bala ke datai.

Pengerusi SIDS Sibu, Ir. Alice, nyua ke tolong ngagai TR Adin.

Alam setaun dua tu mayoh endal ngah rumah panjai udah ditinggang penusah rumah panjai sida iya augus, lalu endang patut endal ngah bala JKKK rumah panjai betati ke nama ke patut dikerja sida nyaga rumah.  Alam penemu SIDS, sekurang-kurangnya rumah panjai patut ngerja tauka bisi utai tu:-
1.  Komiti ngemata ke penglikun pendiau, ie ngechek bilik ke kosong selamat ari sigi api dapur tauka tali wayer rumah,
2.  Rumah panjai bisi pemadam api ke chukup pemayoh, lalu semua bala anembiak nemu ngena iya, serta
3.  BOMBA serta polis patut nemau dini rumah panjai siti-siti ke dipegai sida.

Kemayoh agi cerita ketegal rumah augus ianya, wayer api di rumah jai tauka bala ke tuai lalik maya berapi di dapur.  Kati ulih sekayu rumah panjai betati ke bala kitai ke tuai-tuai ke diau ke diri.  Asai aku nadai salah nanya sida maya sida bisi pansut ke ruai, nanya senentang api dapur sida?  Kala mega ninga beberapa cerita rumah panjai madah ke BOMBA ke dikagau enda nemu dini rumah panjai ke disebut bala ke ngerepot.  Nadai salah bala JKKK nemuai ngagai BOMBA madah ke dini sida, ke pesidang.

Arap ke kitai bejimat magang meh.