"Indai Blues"

Berita dipetik ari Borneo Post, bagi Iban kena 22 Oktober 2009

KUCHING: “Amat bisi kala ninga jaku nya, tang nama reti jaku ‘Indai Blues’?,” ku Presiden Sarakup Indu Dayak Sarawak (SIDS), Senator Dato Sri Empiang Jabu.Iya mansutka jaku nya lebuh iya ditanya pasal berita ke bisi dibantai ba surat berita The Borneo Post enggau Utusan Borneo bedau entu lama tu tadi ke madahka kes sarak entara komuniti Iban pengabis tinggi ba menua tu kelebih agi iya nyadi ba bala raban orang ke gawa ba industri minyak enggau gis (IMG).


Taja pan Empiang madahka naka ni pemayuh kes sarak ke nyadi nadai dirikot tang ku iya, pekara bakatu (kes sarak) sigi amat bisi.


“Aku enda nemu ni pemayuh kes bakatu bisi nyadi laban nadai rikot ke bisi madah bakanya, lalu nambah enggau nya pekara bakatu selalu nyadi ba bala raban indu ke ditinggal laki gawa ke tasik tauka ba nengeri besai lalu sida ke tinggal tu tadi kiruh ngintu ruang bilik, beribun anak enggau pengawa bukai lalu laban ngumbai pengidup nya puang laban laki nadai ba rumah, tu ti ngejungka sida iya nyau berubah ati, lalu bisi mega bepati kin kitu nitih bala pangan, ngereja utai bukai ke mayuh dikangau orang Indai Blues.


“Laban pemisi (belanja) sigi mayuh ditinggalka laki, lalu kadang-kadang udah meda duit mayuh bakanya, lalu enda nemu berunding agi lalu nitihka orang nurun niki kelab malam, karaoke sereta pengawa ke ngerindang ati. Bepun ari tu ngasuh ruang bilik kitai nyadi nadai meruan. Baka munyi leka lagu, ‘ in the heat of the night, you forget what you are doing….’. Tu siti ari kebuah orang nadai agi komitmen ba ruang bilik,” ku iya.


Taja pia, ku Empiang ukai semua orang ke gawa ba industri minyak enggau gis tauka sida ke gawa ba nengeri bisi ulah ke bakanya.


“Nya sebarang ku komitmen individu. Sida ke sigi siru ka ruang bilik enda meh ngereja utai bakanya.


“Muti anang ngena dalih madahka diri baum serakup ngagai laki sida iya. Tu selalu nyadi laban enti laki sida nanya nama kebuah nyau laun pulai, ku jaku lagi madahka baum serakup. Aku madah ditu aum serakup nadai kala datai ngagai jauh malam. Nya nyangka kebuah mayuh laki orang enda ngasuh bini sida iya masuk serakup laban nama serakup tu jai digaga


bakanya. Aku enggai ninga sida iya ngena dalih jaku serakup,” ku iya lalu nambah topik baka tu sigi selalu dibantai ba aum ke diatur sekeda pampang SIDS.


Ku Empiang baru, pengawa sosial diatu jauh udah berubah lalu udah ngubah chara pendiau semua bala mensia mayuh.


“Diatu bala nembiak indu udah abis sekula rindu agi gawa ba nengeri. Lebuh sida ngagai nengeri, sida iya nadai agi dikemata ulih apai indai ke diau ba kampung tauka ba rumah panjai.


“Tu pun penanggul. Sida lalu bisi pangan lalu dibai jadi, lalu nyangka ngagai opis rejista meri notis 24 jam deka jadi enggau lelaki tauka indu lalu mai siku dua saksi, ke enda ditemu apai indai pengawa nya tadi.


“Apai indai patut agi bisi tanggungjawab ba bala anak sida iya kelebih agi sida ti deka nirika ruang bilik. Apai indai patut ngambi inisiatif bekelala enggau lelaki tauka indu ti kedeka anak sida iya.


Sama mega ba bala anak ke patut ngelala apai indai indu tauka lelaki ti kedeka sida, lalu ngemutarka pengawa jadi melaki bini nya. Tu tanggung pengawa begulai lalu ukai pengawa ngatika diri,” ku iya madah maya ditemu udah abis pengawa muka kedai Health Circle ba tHe Spring ditu, kemari.


Taja pan bisi sekeda sarak nya nyadi ku Empiang, iya kadang-kadang pekara ke enda ulih diseliahka laban kadang-kadang bisi kebuah ke mantup ba ati siku-siku, ku iya.


“Sida ke jadi biak patut bisi komitmen ba bini anak sida iya. Enti nitih chara jadi melaki bini chara tradisional kelia, kitai agi diau enggau apai indai tauka enggau mentua lebuh kitai jadi melaki bini. Nya alai, sebarang pengawa kitai, sigi nangi selalu diperatika orang, nya kebuah tikah orang kelia jarang ke mayuh ulah.


“Diatu kitai bisi gerija ke meri jaku ajar tauka kauseling tauka ‘pre-matrimonial couselling’ sebedau kitai jadi melaki bini. Baka raban bansa Melayu, sida pan bisi ‘kauseling rumahtangga’, iya nya madah ngagai sida ke deka jadi pasal adat tikah, sarak enggau pengawa kitai jadi melaki bini.


“Mayuh kitai Iban enda nemu pasal atur tu kelebih agi sida ke diau ba menua pesisir tauka sida ke enda nemu pasal undang-undang. Utai ke selalu nyadi ba kitai indu, udah beranak dua-tiga iku, lalu ditinggalka lelaki tauka bini, sapa ke nyadi tinggang merinsa? Anak kitai nyadi tinggang merinsa. Sapa ke ngibun udah nya? Apai indai ke ngibun bala uchu ke tinggal ke sida nya tadi. Nya alai, sebedau utai ke bansa tu nyadi, apai indai patut ngajar anak. Ukai ngenanka anak kitai belaki bebini,” ku iya.


Kelimpah ari nya mega, Empiang madah siti ari chara ngemutarka bala anak ke deka belaki tauka bebini, atur tikah sida iya taja pan diatur ba nengah adat rumah panjai patut mega di rejista ba opis rejista tikah, tauka opis Ketuai Pelilih Menua (DO) kena nyeliahka penanggul bini ke kena tinggal maya laki sida ninggalka sida iya.


“Tu awakka nadai sebarang penanggul bini kena tinggal laki sida iya. Enti pekara sarak nyadi, nyamai kitai ngiga lelaki nya nitihka undangundang. Apai indai betanggungjawab ba tikah anak sida iya. Bekelala enggau apai indai nembiak ke deka jadi enggau anak kita. Atur pengawa tikah nitihka undang-undang, tauka kontrak tikah ba gerija tauka opis rejista,” ku iya.


Ku Empiang baru, ukai pekara ke manah didinga enti orang bejaku pasal kes sarak ke mayuh nyadi ba bansa Iban.


“Nama reti enti orang udah bejaku munyi nya? Nya reti iya lebuh kitai bedau abis mutus runding jadi melaki bini tang kitai mega bedau sedia, lalu nambah enggau nya apai indai semina nurut utai ku anak sida iya, maya ubah nya datai ba pengidup kitai lalu kita enda sedia, nya maya kitai ditinggang penusah bakatu ti ngejungka kes sarak mayuh nyadi,” ku iya.


Gerempung SIDS nyangka deka ngatur mayuh agi seminar pasal kes bakatu taja pan ku Empiang, ungkup kena ngereja tu enda mayuh, tang tu meh pekara ke berat, ku iya.


“SIDS nadai mayuh ungkup kena ngereja kelalu mayuh projek tang kami nguji enggau naka ulih berati ngatur seminar baka tu. Naka kediatu, pampang SIDS Sibu siti pampang ke aktif bejurai pasal isu ruang bilik tu. Ba pampang Kuching ditu, SIDS mayuh agi ngemeranka pengawa latih enggau pelajar.


“Aku ngarapka pampang SIDS bukai deka belabuh bejurai pasal isu tu, tauka sebarang pekara ke selalu nyadi ngelingi sida iya. Kami semina ulih mantai sereta enggau naka ulih nagang isu tu nambah tang nya barang ku siku-siku ngemutarka pendiau sida iya, enda ngira raban indu aja, pia mega ba sida ke lelaki,” ku iya.