Aum Besai SIDS Sibu ke 22 kali
Bala SIDS Sibu bisi ngatur Aum Besai kali ke 22 di Hotel Kingwood, Sibu kena 9.3.2014 tu kemari. Maya nya semua Tuai Kawasan enggau 2 orang kaban ari setiap kawasan bisi dikagau enggau baum serta ninga ke seminar 1/2 hari belajar ke pasar nulis minit aum serta ngibun bup kira-kira.
Aba aum nya, Pengerusi SIDS Sibu, Ir Alice Jawan, mega ngansak bala aktif agi enggau ngulu pengawa ke diatur. Iya madah ke taun tu, mayoh program bisi deka diatur nyengkaum kelas betenun, kelas ngajat, kelas betaboh, serta seminar pemansang ke deka diatur di kawasan siti-siti, kelebih agi kawasan rumah panjai. Iya mega madah ke penyerakup kitai indu Dayak/Iban patut di 'ibun' kitai enggau manah; laban ari kitai ke berserakup, serta ari kitai ke ngena siti suara - kitai didinga orang & kitai mega dibasa orang. Iya mega ngenatai ke pengaga ati SIDS Sibu ketegal siko ari kaban udah dipadu ke nyadi Kunselor aba SRDC. SIDS Sibu meri tahniah ngagai Cr. Lidwina Mathew.
Randau pasal minit enggau akaun diberi oleh Sekretari, Pn. Angelyn Uchi Maseng serta mega Pemegai Wang, Pn. Monica Giri.
Repot tu ditulis Sekretari, Pn. Angelyn Uchi Maseng.
No comments:
Post a Comment
engkah komen kita ditu....